സൈക്കിളുകളുടെ ഉപയോഗം പരമാവധി പ്രോത്സാഹിപ്പിക്കുക എന്ന ലക്ഷ്യത്തോടെ എല്ലാ വർഷവും ജൂൺ 3 ന് ലോക സൈക്കിൾ ദിനമായി (World Bicycle Day) ആചരിക്കുന്നു. പരിസ്ഥിതി സംരക്ഷണവും ആരോഗ്യവും പരിപോഷിപ്പിക്കുന്ന, ലളിതവും ചെലവ് കുറഞ്ഞതും പരിസ്ഥിതി സൗഹൃദവുമായ ഗതാഗത മാർഗമാണ് സൈക്കിൾ. പരിസ്ഥിതി മലിനീകരണം കുറക്കാനും ജനങ്ങളുടെ ആരോഗ്യം, സുരക്ഷ, മൊത്തത്തിലുള്ള ജീവിത നിലവാരം എന്നിവ മെച്ചപ്പെടുത്താനും സൈക്ലിംഗ് സഹായിക്കും. വളണ്ടിയർമാർ സൈക്കിൾ സവാരി നടത്തി ആളുകൾക്കിടയിൽ ബോധവൽക്കരണം നടത്തി.
ജി.വി.എച്ച്.എസ്.എസ് പെരിന്തൽമണ്ണ വി.എച്ച്.എസ്.ഇ. വിഭാഗം എൻ.എസ്.എസ്. യൂണിറ്റിന്റെ നേതൃത്വത്തിൽ സൗജന്യ പ്രമേഹ രക്തസമ്മർദ്ദ നിർണയ ക്യാമ്പ് നടത്തി. പെരിന്തൽമണ്ണ തറയിൽ ബസ് സ്റ്റാൻഡിൽ വച്ച് നടത്തിയ ക്യാമ്പ് മുൻസിപ്പൽ വികസന കാര്യ സ്റ്റാൻഡിങ് കമ്മിറ്റി ചെയർപേഴ്സൺ ശ്രഅമ്പിളി മനോജ് ബി. പി., പ്രമേഹ പരിശോധന നടത്തി ഉദ്ഘാടനം ചെയ്തു. സ്കൂൾ പി.ടി.എ. പ്രസിഡന്റ് കിനാതിയിൽ സാലിഹ് അധ്യക്ഷത വഹിച്ചു. വി.എച്ച്.എസ്.ഇ. പ്രിൻസിപ്പൽ രാജീവ് ബോസ് സ്വാഗതം ആശംസിക്കുകയും എൻ.എസ്.എസ്. പ്രോഗ്രാം ഓഫീസർ അമ്പിളി. എൻ. നന്ദി അറിയിക്കുകയും ചെയ്തു. അധ്യാപകരായ സജ്ന അമ്പലക്കുത്ത്, സിന്ധു. കെ , ഷെഫ്ലിൻ.എൻ.എ., ഷിഹാബുദീൻ വി.കെ., ഷാനിബ് തുടങ്ങിയവർ ആശംസകൾ അറിയിച്ചു. വിവിധ മേഖലയിൽ ഉൾപ്പെട്ട വ്യക്തിത്വങ്ങളും പൊതുജനങ്ങളുമായി ഇരുന്നൂറോളം പേർക്ക് സൗജന്യ പരിശോധന നടത്തി പെരിന്തൽമണ്ണ വി.എച്ച്.എസ്.ഇ. എൻ.എസ്.എസ്. വളന്റിയർസ് സമൂഹത്തിൽ ഒരിക്കൽ കൂടി തങ്ങളുടെ വ്യക്തിമുദ്ര പതിപ്പിച്ചു.
വനിതാ ദിനത്തോടനുബന്ധിച്ച് വി.എച്ച്.എസ്.ഇ. വിഭാഗത്തിന് ഭാരതീയ നാഷണൽ ജനതാദൾ ഇൻസിനറേറ്റർ സ്ഥാപിച്ചു നൽകുന്നതിൻറെ രേഖകൾ കൈമാറി. ചടങ്ങിൽ ബി.എൻ.ജെ.ഡി. ജില്ലാ വൈസ് പ്രസിഡന്റ് സിന്ധു.ആർ.നായർ, സംസ്ഥാന കമ്മിറ്റിയംഗം ഗോപി, സ്കൂൾ പി.ടി.എ. പ്രസിഡൻറ് കിനാതിയിൽ സാലിഹ്, പ്രിൻസിപ്പൽ രാജീവ് ബോസ്, എൻ.എസ്എസ്. പ്രോഗ്രാം ഓഫീസർ അമ്പിളി.എൻ., വളണ്ടിയേഴ്സ് എന്നിവർ പങ്കെടുത്തു.
"അവെയർ ക്യാൻസർ" ക്യാമ്പയിന്റെ ഭാഗമായി പെരിന്തൽമണ്ണ വി.എച്ച്.എസ്.ഇ. എൻ.എസ്.എസ്. യൂണിറ്റിന്റെ ആഭിമുഖ്യത്തിൽ ക്യാൻസർ അവെയർനെസ്സ് വെബിനാർ നടന്നു. കോഴിക്കോട് എം.വി.ആർ. ക്യാൻസർ സെന്ററിലെ റേഡിയേഷൻ ഓങ്കോളജിസ്റ്റ് ഡോ. വിഷ്ണു രാജൻ നമ്പ്യാർ സെഷൻ കൈകാര്യം ചെയ്തു.
ബഹുമാനപ്പെട്ട മുഖ്യമന്ത്രിയുടെ പത്തിന പരിപാടിയിൽ ഉൾപ്പെടുന്ന വിവര സാക്ഷരതാ ക്യാമ്പയിൻ ആണ് സത്യമേവ ജയതേ. സാമൂഹിക മാധ്യമങ്ങളിലൂടെ പ്രചരിക്കുന്ന വ്യാജ വാർത്തകൾക്കെതിരായ ബോധവൽക്കരണ പ്രവർത്തനമാണ് ഇത്. ഇതിന്റെ പരിശീലന പരിപാടിയിൽ കരിയർ മാസ്റ്റർ സിന്ധു.കെ. പങ്കെടുത്തു. തുടർപ്രവർത്തനമായി അധ്യാപകർക്കും വിദ്യാർത്ഥികൾക്കും ക്ളാസുകൾ നൽകി.
പെരിന്തൽമണ്ണ ഗവഃ വൊക്കേഷണൽ ഹയർസെക്കണ്ടറി സ്കൂളിലെ വിദ്യാർത്ഥികൾക്കായി കരിയർ ഗൈഡൻസ് സെല്ലിന്റെ ആഭിമുഖ്യത്തിൽ രണ്ടാം ഫേസ്-ടു-ഫേസ് പരിപാടി ഓൺലൈനായി നടത്തി. വി.എച്ച്.എസ്.ഇ. പഠനത്തിന് ശേഷം പാരാമെഡിക്കൽ പോസ്റ്റ് ഗ്രാജുവേഷൻ കഴിഞ്ഞ് ഇന്ത്യയിലും മിഡിൽ-ഈസ്റ്റ് രാജ്യങ്ങളിലുമായി ഹെൽത്ത് കെയർ ആൻഡ് ഡയഗ്നോസ്റ്റിക് സർവീസസിൽ മാനേജ്മെന്റ് പ്രൊഫഷണലായി പ്രവർത്തിച്ചു വരുന്ന ശ്രീ. ബ്രിഞ്ചു കുഞ്ഞുമോനായിരുന്നു ക്ലാസ് കൈകാര്യം ചെയ്തത്. സ്വന്തം അഭിരുചികളും, വി.എച്ച്.എസ്.ഇ.-യിൽ പഠിച്ച മാനേജ്മെന്റ് പാഠങ്ങളും, അതൊടൊപ്പം കഠിനാധ്വാനവും അദ്ദേഹത്തെ വിജയത്തിലെത്തിച്ചു എന്ന് വിദ്യാർത്ഥികൾക്ക് മനസ്സിലായി.
കരിയർ ഗൈഡൻസ് സെൽ നടത്തുന്ന ജില്ലാ/മേഖലാ തല ദ്വിദിന നേതൃത്വ ക്യാമ്പിൽ വിദ്യാർത്ഥി പ്രതിനിധികളായ ദേവാനന്ദ്, ഫാത്തിമ ഫിദ എന്നിവർ പങ്കെടുത്തു. ജനുവരി 18, 19 തിയതികളിലായി ഓൺലൈനായാണ് സെഷനുകൾ നടന്നത്.
പെരിന്തൽമണ്ണ ഗവഃ വൊക്കേഷണൽ ഹയർസെക്കണ്ടറി സ്കൂളിലെ വിദ്യാർത്ഥികൾക്കായി കരിയർ ഗൈഡൻസ് സെല്ലിന്റെ ആഭിമുഖ്യത്തിൽ ആദ്യ ഫേസ്-ടു-ഫേസ് പരിപാടി ഓൺലൈനായി നടത്തി. പെരിന്തൽമണ്ണ വി.എച്ച്.എസ്.ഇ.-യിലെ പൂർവ്വ വിദ്യാർത്ഥിയും ലാബ് ടെക്നീഷ്യനും, അങ്ങാടിപ്പുറത്തു പ്രവർത്തിച്ചു വരുന്ന സേവനാ ലാബിന്റെ ഉടമയുമായ ശ്രീ. പ്രവീൺ. സി.എസ്. ആണ് തന്റെ അനുഭവങ്ങൾ കുട്ടികളുമായി പങ്കുവെച്ചത്. തൊഴിലധിഷ്ഠിത വിദ്യാഭ്യാസത്തിന്റെ മേന്മയും അതിലൂടെ സ്വയംസംരംഭകരാകാനുള്ള സാധ്യതകളും ഏറെയാണെന്ന് വിദ്യാർത്ഥികൾക്ക് ചർച്ചയിൽ നിന്നും മനസ്സിലാക്കാൻ സാധിച്ചു.
പെരിന്തൽമണ്ണ ജി.ജി.വി.എച്ച്.എസ്.എസിൽ കരിയർ ഗൈഡൻസ് സെല്ലിന്റെ നേതൃത്വത്തിൽ ലൈഫ് സ്കിൽ കൗൺസലിങ് ക്ലാസ് ഓൺലൈനായി നടത്തി. കീഴുപറമ്പ് ഗവഃ വൊക്കേഷണൽ ഹയർസെക്കണ്ടറി സ്കൂളിലെ അധ്യാപകനും, മോട്ടിവേഷണൽ സ്പീക്കറും ട്രെയിനറുമായ ശ്രീ. പ്രദീപ് ബി.വി. ആണ് ക്ലാസ് എടുത്തത്. അസാധാരണവും, വ്യത്യസ്തവുമായ ഒരു ജീവിതം കെട്ടിപ്പടുക്കുന്നതിനായി കുട്ടികൾക്ക് ആവശ്യമായ സ്കില്ലുകൾ അദ്ദേഹം വിവരിച്ചു കൊടുത്തു. മനസ്സിനെ നിയന്ത്രിച്ച് വിവേകപൂർണ്ണമായ ചിന്തകൾ കുട്ടികളുടെ ഭാഗത്തു നിന്നും ഉണ്ടാവണം. നമ്മുടെ ചിന്തകൾ വാക്കുകളും, വാക്കുകൾ പ്രവൃത്തികളും, ചെയ്യുന്ന പ്രവൃത്തികൾ ശീലവുമായി സ്വഭാവരൂപീകരണത്തിനും തുടർന്ന് വ്യക്തിത്വരൂപീകരണത്തിലേക്കും നയിക്കുന്നു. നമ്മുടെ വ്യക്തിത്വം ആത്യന്തികമായി ഭാഗധേയത്വത്തെ നിർണ്ണയിക്കുന്നു. ആയതിനാൽ നല്ല ചിന്തകളുടെ ഉറവിടമാകണം നമ്മുടെ മനസ്സ്. ക്ലാസിന്റെ അവസാനം കുട്ടികൾക്കുള്ള സംശയനിവാരണവും നടത്തുകയുണ്ടായി.
