പെരിന്തൽമണ്ണ ഗവ. വൊക്കേഷണൽ ഹയർസെക്കണ്ടറി സ്കൂളിൽ കരിയർ ഗൈഡൻസ് ആൻഡ് കൗൺസലിങ് സെല്ലിൻറെ ആഭിമുഖ്യത്തിൽ രക്ഷകർത്താക്കൾക്കുള്ള ബോധവൽക്കരണ ക്ലാസ് 'പോസിറ്റീവ് പാരന്റിങ്' 27-12-2020 നു രാത്രി 7-ന് ഗൂഗിൾ മീറ്റിലൂടെ നടത്തി. കേരള ഗവൺമെന്റിന്റെ 'ഒപ്പം' പ്രോജക്ട് കൗൺസിലറായ ഡോ. ചിത്ര മോഹൻ ക്ലാസ് കൈകാര്യം ചെയ്തു. പ്രിൻസിപ്പൽ രാജീവ് ബോസ്, കരിയർ മാസ്റ്റർ കെ. സിന്ധു എന്നിവർ സംസാരിച്ചു. സ്റ്റുഡൻറ് ലീഡർ എസ്. മമിത നന്ദി അറിയിച്ചു.
പെരിന്തൽമണ്ണ ഗവ. വൊക്കേഷണൽ ഹയർസെക്കണ്ടറി സ്‌കൂൾ കരിയർ ഗൈഡൻസ് സെല്ലിന്റെ ആഭിമുഖ്യത്തിൽ പെൺകുട്ടികൾക്കായി ഷീ ക്യാമ്പ് നടത്തി. 20-12-2020 രാത്രി 7 മണിക്ക് ഗൂഗിൾ മീറ്റ് വഴിയാണ് ക്ലാസ് നടന്നത്. സ്‌കൂൾ പ്രിൻസിപ്പൽ രാജീവ് ബോസ് ഉദ്ഘാടനം ചെയ്തു. കേരള ഹെൽത്ത് സർവീസിലെ അസിസ്റ്റന്റ് സർജനായ ഡോ. എസ്. ഇന്ദു ക്ലാസെടുത്തു. പ്രസ്തുത ക്ലാസിൽ വിദ്യാർത്ഥിനികളുടെ ആരോഗ്യപരിപാലനത്തെക്കുറിച്ചും, കൗമാരപ്രശ്നങ്ങളെക്കുറിച്ചും ബോധവൽക്കരണം നടത്തി. വിദ്യാർത്ഥിനികൾക്കുള്ള സംശയനിവാരണവും നടന്നു. കരിയർ ഗൈഡൻസ് കോഓർഡിനേറ്റർ സിന്ധു.കെ. നേതൃത്വം നൽകി. അധ്യാപികമാരും അൻപത്തിയഞ്ചോളം വിദ്യാർത്ഥിനികളും ക്ലാസിൽ പങ്കെടുത്തു. ക്ലാസ് ലീഡർ ഫാത്തിമ അഫ്‌നാൻ നന്ദി പ്രകാശിപ്പിച്ചു.
വി.എച്ച്.എസ്.ഇ. ഒന്നാം വർഷ വിദ്യാർത്ഥികളുടെ ഈ അധ്യയന വർഷത്തിലെ ആദ്യത്തെ ക്ലാസ്സ്‌ പി.ടി.എ. യോഗം 19-12-2020 ന് ഗൂഗിൾ മീറ്റ് വഴി നടന്നു. പ്രസ്തുത യോഗത്തിൽ വി.എച്ച്.എസ്.ഇ. പ്രിൻസിപ്പൽ രാജീവ് ബോസ് ആമുഖ പ്രഭാഷണം നടത്തി. സ്‌കൂൾ പി.ടി.എ. പ്രസിഡന്റ് കിനാതിയിൽ സാലിഹ് യോഗം ഉദ്ഘാടനം ചെയ്തു. അറുപതോളം രക്ഷിതാക്കൾ യോഗത്തിൽ പങ്കെടുത്തു. അധ്യാപികയായ ലിസിമോൾ പുതിയ എൻ.എസ്.ക്യു.എഫ്. കോഴ്‌സുകളുടെ ഘടനയെക്കുറിച്ച് വിശദീകരിച്ചു. ഓരോ വിഷയവും കൈകാര്യം ചെയ്യുന്ന അധ്യാപകർ തങ്ങളുടെ ഓൺലൈൻ ക്ലാസുകൾ, സപ്പോർട്ട് ക്ലാസുകൾ, തുടർപ്രവർത്തനങ്ങൾ തുടങ്ങിയ കാര്യങ്ങൾ അടങ്ങിയ വിശദമായ റിപ്പോർട്ട്‌ അവതരിപ്പിച്ചു. അതിനു ശേഷം രക്ഷിതാക്കൾ സംശയനിവാരണം നടത്തി. ക്ലാസ് അധ്യാപകരായ സിന്ധു.കെ., രശ്മി.കെ. എന്നിവർ നേതൃത്വം നൽകി.
ഒന്നാം വർഷ വിദ്യാർത്ഥികൾക്കുള്ള ഇമ്പ്രൂവ്മെന്റ് പരീക്ഷകൾ ആരംഭിച്ചു. ഡിസംബർ 18 മുതൽ 23 വരെയാണ് പരീക്ഷകൾ നടക്കുക. വിദ്യാർത്ഥികൾക്ക് തങ്ങളുടെ ഒന്നാം വർഷ സ്‌കോറുകൾ മെച്ചപ്പെടുത്താനുള്ള അവസരം ഈ പരീക്ഷയിലൂടെ ലഭിക്കും.
വി.എച്ച്.എസ്.ഇ. രണ്ടാം വർഷ വിദ്യാർത്ഥികളുടെ ഈ അധ്യയന വർഷത്തിലെ ആദ്യത്തെ ക്ലാസ്സ്‌ പി.ടി.എ. യോഗം 17-12-2020 ന് ഗൂഗിൾ മീറ്റ് വഴി നടന്നു. പ്രസ്തുത യോഗത്തിൽ എസ്.ആർ.ജി. കൺവീനർ സജ്‌ന അമ്പലക്കുത്ത് സ്വാഗതവും വി.എച്ച്.എസ്.ഇ. പ്രിൻസിപ്പൽ രാജീവ് ബോസ് ആമുഖ പ്രഭാഷണവും നടത്തി. സ്‌കൂൾ പി.ടി.എ. പ്രസിഡന്റ് കിനാതിയിൽ സാലിഹ് യോഗം ഉദ്ഘാടനം ചെയ്തു. അമ്പതോളം രക്ഷിതാക്കൾ യോഗത്തിൽ പങ്കെടുത്തു. ഓരോ വിഷയവും കൈകാര്യം ചെയ്യുന്ന അധ്യാപകർ തങ്ങളുടെ ഓൺലൈൻ ക്ലാസുകൾ, സപ്പോർട്ട് ക്ലാസുകൾ, തുടർപ്രവർത്തനങ്ങൾ തുടങ്ങിയ കാര്യങ്ങൾ അടങ്ങിയ വിശദമായ റിപ്പോർട്ട്‌ അവതരിപ്പിച്ചു. അതിനു ശേഷം രക്ഷിതാക്കൾ സംശയനിവാരണം നടത്തി. ഈ യോഗത്തിന്റെ ഫലമായി രക്ഷിതാക്കളുടെ ആശങ്കകൾ ഒരു പരിധി വരെ ലഘൂകരിക്കാൻ സാധിച്ചു എന്നതിൽ സംശയമില്ല. സ്റ്റാഫ് സെക്രട്ടറി രാധിക.എം.ജി. നന്ദി പ്രകാശിപ്പിച്ചു.
കാലിഗ്രഫി സ്കിൽ പ്രധാന വിഷയമായി പെരിന്തൽമണ്ണ ഗവ. വൊക്കേഷണൽ ഹയർസെക്കണ്ടറി സ്‌കൂൾ എൻ.എസ്.എസ്. യൂണിറ്റ് സ്കിൽ പ്രോഗ്രാം സംഘടിപ്പിച്ചു. സൂം പ്ലാറ്റ്ഫോം വഴി നടന്ന സ്റ്റേറ്റ് ലെവൽ ട്രെയിനിങ് സെഷനിൽ വിവിധ ജില്ലകളിൽ നിന്നുള്ള എൻ.എസ്.എസ്. വളണ്ടിയർമാരും അധ്യാപകരും പങ്കെടുത്തു. പ്രസ്തുത പരിപാടി പ്രശസ്ത ഗായകൻ ജി.വേണുഗോപാൽ ഉദ്ഘാടനം ചെയ്തു. അദ്ദേഹത്തിന്റെ മനോഹരഗാനം ഈ ചടങ്ങിന് ഉണർവേകി. സ്‌കൂൾ പി.ടി.എ. പ്രസിഡൻറ് കിനാതിയിൽ സാലിഹിന്റെ അധ്യക്ഷതയിൽ നടന്ന ചടങ്ങിൽ കുറ്റിപ്പുറം റീജിയൺ അസിസ്റ്റന്റ് ഡയറക്ടർ എം.ഉബൈദുള്ള മുഖ്യപ്രഭാഷണം നടത്തി. ചലച്ചിത്ര താരം സുനിൽ സുഗത, എൻ.എസ്.എസ്. സ്റ്റേറ്റ് കോർഡിനേറ്റർ പി.രഞ്ജിത്ത്, റീജിയണൽ കോർഡിനേറ്റർ കെ. ബാലു മനോഹർ, ഡിസ്ട്രിക്റ്റ് കോർഡിനേറ്റർ പി.കെ. മണികണ്ഠൻ, പി.എ.സി. മെമ്പർ എൻ.എസ്.ഫാസിൽ എന്നിവർ ചടങ്ങിന് ആശംസകൾ അറിയിച്ചു. വി.എച്ച്.എസ്.ഇ. പ്രിൻസിപ്പൽ രാജീവ് ബോസ് സ്വാഗതവും പ്രോഗ്രാം ഓഫീസർ അമ്പിളി നാരായണൻ നന്ദിയും പറഞ്ഞു.
"കാലിഗ്രഫി - ദ വിഷ്വൽ ആർട്ട് ഓഫ് റൈറ്റിംഗ്" എന്ന ക്ലാസ് ആയിരുന്നു ഈ പ്രോഗ്രാമിന്റെ പ്രധാന ആകർഷണം. അക്ഷരങ്ങളെ കൂടുതൽ മനോഹരമാക്കി എഴുതുന്ന രീതിയാണ് കാലിഗ്രഫി. സെഷൻ കൈകാര്യം ചെയ്ത ലതിക അജിത്കുമാർ പേന, പെൻസിൽ, ബ്രഷ് ഇവ ഉപയോഗിച്ച് അക്ഷരങ്ങളെ മനോഹരമാക്കി എഴുതുവാനും അതിൽ പാലിക്കേണ്ട നിയമങ്ങളും വിശദമായി പ്രതിപാദിച്ചു. അക്ഷരങ്ങൾ കാലിഗ്രഫി രീതിയിൽ എഴുതുന്നതിന് കുട്ടികളെ പരിശീലിപ്പിച്ചു. ക്ലാസിന് ശേഷം വിദ്യാർത്ഥികളുടെ സംശയങ്ങൾക്ക് മറുപടിയും നൽകി. വിവിധ ജില്ലകളിൽ നിന്നായി 430 ഓളം കുട്ടികൾ പങ്കെടുത്ത പ്രോഗ്രാം എല്ലാവർക്കും ഉപകാരപ്രദമായി.
ലോക എയ്ഡ്സ് ദിനത്തോടനുബന്ധിച്ച് എൻ.എസ്.എസ്. വളണ്ടിയർമാർ പോസ്റ്ററുകൾ നിർമിച്ചു. എയ്ഡ്സ് ന്റെ വിപത്തുകൾ ചൂണ്ടിക്കാണിക്കുന്നതും പ്രത്യാശ പകരുന്നതുമായിരുന്നു പോസ്റ്ററുകൾ.
പെരിന്തൽമണ്ണ വി.എച്ച്.എസ്.ഇ. എൻ.എസ്.എസ്. യൂണിറ്റിന്റെ ഔപചാരികമായ ഉദ്ഘാടനം ഗൂഗിൾ മീറ്റ് ഓൺലൈൻ പ്ലാറ്റ്ഫോം വഴി നടന്നു. പ്രശസ്ത സിനിമാ-സീരിയൽ ആർട്ടിസ്റ്റ് ശ്രീ. മനുവർമ്മ ഉദ്ഘാടനം നിർവഹിച്ചു. സ്‌കൂൾ പി.ടി.എ. പ്രസിഡൻറ് ശ്രീ. കിനാതിയിൽ സാലിഹ്-ന്റെ അധ്യക്ഷതയിൽ ചേർന്ന ചടങ്ങിൽ സിനിമാ ഗാനരചയിതാവ് ശ്രീ. വയലാർ ശരത്ചന്ദ്രവർമ്മ, സിനിമാനടൻ ശ്രീ. ദേവൻ എന്നിവർ ആശംസകൾ നേർന്നു. വി.എച്ച്.എസ്.ഇ. കുറ്റിപ്പുറം മേഖലാ അസിസ്റ്റൻറ് ഡയറക്ടർ ശ്രീ. എം.ഉബൈദുള്ള മുഖ്യപ്രഭാഷണം നടത്തി. എൻ.എസ്.എസ്. സ്റ്റേറ്റ് കോർഡിനേറ്റർ ശ്രീ. പി.രഞ്ജിത്ത് എൻ.എസ്.എസ്. സന്ദേശം നൽകി. ഹയർസെക്കണ്ടറി പ്രിൻസിപ്പൽ ശ്രീമതി. എം.എസ്. ശോഭ, സ്‌കൂൾ ഹെഡ്മാസ്റ്റർ ശ്രീ. പി.സക്കീർ ഹുസൈൻ, എൻ.എസ്.എസ്. റീജിണൽ കോർഡിനേറ്റർ ശ്രീ. കെ. ബാലു മനോഹർ, എൻ.എസ്.എസ്. ജില്ലാ കോർഡിനേറ്റർ ശ്രീ. പി.കെ. മണികണ്ഠൻ, എൻ.എസ്.എസ്. പി.ഏ.സി. മെമ്പർ ശ്രീ. എൻ.എസ്. ഫാസിൽ എന്നിവർ ആശംസകൾ അർപ്പിച്ചു. പ്രിൻസിപ്പൽ ശ്രീ. രാജീവ് ബോസ് സ്വാഗതവും എൻ.എസ്.എസ്. പ്രോഗ്രാം ഓഫീസർ ശ്രീമതി. എൻ.അമ്പിളി നന്ദിയും പറഞ്ഞു.
പൊതുവിദ്യാഭ്യാസ വകുപ്പ് വൊക്കേഷണൽ ഹയർസെക്കണ്ടറി വിഭാഗം കരിയർ ഗൈഡൻസ് ആൻറ് കൗൺസലിംഗ് സെൽ 2019-20 അധ്യയന വർഷത്തിൽ ജില്ലകളിൽ മികച്ച പ്രവർത്തനം കാഴ്ച വെച്ച കരിയർ മാസ്റ്റർമാർക്കുള്ള അവാർഡുകൾ പ്രഖ്യാപിച്ചു. പെരിന്തൽമണ്ണ വി.എച്ച്.എസ്.ഇ. യിലെ കരിയർ ഗൈഡൻസ് ആൻറ് കൗൺസലിംഗ് സെൽ കോ-ഓർഡിനേറ്റർ ആയിരുന്ന ശ്രീമതി. അമ്പിളി നാരായണൻ ആണ് മലപ്പുറം ജില്ലയിൽ അവാർഡിന് അർഹയായത്. ഇപ്പോൾ എൻ.എസ്.എസ്. പ്രോഗ്രാം ഓഫീസർ ചാർജ് വഹിക്കുന്നു.
ജി.വി.എച്ച്.എസ്.എസ്. പെരിന്തൽമണ്ണ എൻ.എസ്.എസ്. യൂണിറ്റിന്റെ ആഭിമുഖ്യത്തിൽ ലോക പ്രമേഹദിനത്തോടനുബന്ധിച്ച് ക്ലാസ് സംഘടിപ്പിച്ചു. മലബാർ ഡെന്റൽ കോളേജ്, എടപ്പാൾ-ലെ അനാട്ടമി വിഭാഗം അസിസ്റ്റൻറ് പ്രൊഫസർ ഡോ. പി.റഫീക്ക് കുട്ടികളുമായി സംവദിച്ചു. കോവിഡ് പ്രോട്ടോക്കോൾ പാലിച്ച് ഓൺലൈൻ പ്ലാറ്റ്ഫോം വഴിയാണ് ക്ലാസ് നടന്നത്. പ്രിൻസിപ്പൽ രാജീവ് ബോസ്, എൻ.എസ്.എസ്. പ്രോഗ്രാം ഓഫീസർ അമ്പിളി നാരായണൻ, അധ്യാപിക സജ്‌ന അമ്പലക്കുത്ത് എന്നിവർ സംസാരിച്ചു. ഒന്നാം വർഷ വിദ്യാർത്ഥിനി ഇഷ.ഇ. നന്ദി പ്രകാശിപ്പിച്ചു. മലപ്പുറം ജില്ലയിലെ വിവിധ സ്കൂളുകളിൽ നിന്നായി എഴുപതോളം വിദ്യാർത്ഥികൾ പങ്കെടുത്തു. പ്രമേഹത്തെക്കുറിച്ച് ഒരു അവബോധം വിദ്യാർത്ഥികളിൽ സൃഷ്ടിക്കാൻ ഈ സെഷൻ സഹായകമായി.
പെരിന്തൽമണ്ണ ഗവ. വൊക്കേഷണൽ ഹയർസെക്കണ്ടറി സ്‌കൂൾ കരിയർ ഗൈഡൻസ് ആൻഡ് കൗൺസലിങ്ങ്‌ സെല്ലിന്റെ ആഭിമുഖ്യത്തിൽ ഒന്നാം വർഷ വി.എച്ച്.എസ്.ഇ. വിദ്യാർത്ഥികൾക്കുള്ള സ്വാഗത സെമിനാർ "നവീനം 2020" ഓൺലൈൻ പ്ലാറ്റ്‌ഫോമിൽ നടത്തി. പ്രസ്തുത പരിപാടിയിൽ കരിയർ ഗൈഡൻസ് കോഓർഡിനേറ്റർ ശ്രീമതി സിന്ധു കെ. സ്വാഗതവും, വി.എച്ച്.എസ്.ഇ. വിഭാഗം പ്രിൻസിപ്പൽ ശ്രീ രാജീവ് ബോസ് ആമുഖ പ്രഭാഷണവും നടത്തി. "നവീനം 2020" ന്റെ ഉദ്ഘാടനം നിർവ്വഹിച്ചത് സ്‌കൂൾ പി.ടി.എ. പ്രസിഡന്റ് ശ്രീ. കിനാതിയിൽ സാലിഹ് ആണ്. ഹയർസെക്കണ്ടറി പ്രിൻസിപ്പൽ ശ്രീമതി എം.എസ്. ശോഭ, ഹെഡ്മാസ്റ്റർ ശ്രീ. പി. സക്കീർ ഹുസൈൻ എന്നിവർ ആശംസകൾ അർപ്പിച്ചു. പുതുതായി അനുവദിച്ച എൻ.എസ്.ക്യു.എഫ്. കോഴ്സുകളായ ഫ്രണ്ട് ലൈൻ ഹെൽത്ത് വർക്കർ, മെഡിക്കൽ എക്യുപ്മെന്റ് ടെക്നിഷ്യൻ എന്നിവയെ കുറിച്ചുള്ള മൊഡ്യൂൾ അവതരണം ശ്രീമതി ലിസിമോൾ, ശ്രീ. ഷെഫ്ലിൻ.എൻ.എ. എന്നിവർ നിർവ്വഹിച്ചു. വി.എച്ച്.എസ്.ഇ. വിഭാഗത്തിനായി ഈ വർഷം അനുവദിച്ച എൻ.എസ്.എസ്. യുണിറ്റ് നെ കുറിച്ച് ശ്രീമതി. അമ്പിളി നാരായണൻ വിശദീകരിച്ചു. വിദ്യാർത്ഥികളുടെയും രക്ഷിതാക്കളുടേയും സംശയ നിവാരണം പ്രിൻസിപ്പലിന്റെ നേതൃത്വത്തിൽ നടത്തപ്പെട്ടു. വി.എച്ച്.എസ്.ഇ. വിഭാഗം ലീഡർ കുമാരി. ഫാത്തിമ അഫ്നാന്റെ നന്ദിയോടു കൂടി പ്രോഗ്രാം അവസാനിച്ചു.
ഒന്നാം വർഷ ക്ളാസുകൾ വിക്ടേഴ്‌സ് ചാനൽ വഴി സംപ്രേഷണം ആരംഭിച്ചു. കോവിഡിന്റെ പശ്ചാത്തലത്തിൽ ഇപ്പോൾ ഓൺലൈനായാണ് ക്ളാസുകൾ നൽകുക. ഈ ക്ലാസുകളുടെ തുടർപ്രവർത്തനങ്ങൾ അധ്യാപകരുടെ നേതൃത്വത്തിൽ നടക്കും.
കേരളപ്പിറവി ദിനാഘോഷത്തോടനുബന്ധിച്ച് പെരിന്തൽമണ്ണ വി.എച്ച്.എസ്.ഇ. യിലെ ഒന്നാം വർഷ വിദ്യാർത്ഥികൾ കോവിഡ് പ്രോട്ടോക്കോൾ പാലിച്ച് ആശംസകൾ അർപ്പിച്ചു. 40-ഓളം വിദ്യാർത്ഥികൾ 64-ാം പിറന്നാൾ ആഘോഷിക്കുന്ന കേരളസംസ്ഥാനത്തിന് ആശംസകൾ നേർന്നു. എൻ.എസ്.എസ്. പ്രോഗ്രാം ഓഫീസർ അമ്പിളി നാരായണൻ, ബയോളജി അധ്യാപിക സജ്‌ന അമ്പലക്കുത്ത് എന്നിവർ നേതൃത്വം നൽകി.
പെരിന്തൽമണ്ണ വി.എച്ച്.എസ്.ഇ. യിൽ സ്വാശ്രയമേഖലയിൽ നാഷണൽ സർവീസ് സ്‌കീം യൂണിറ്റ് അനുവദിച്ച് ഉത്തരവായി. ഇതോടെ കാലങ്ങളായുള്ള സ്‌കൂളിന്റെ ആവശ്യം സാക്ഷാത്കരിക്കുകയാണ്. ഇനി വി.എച്ച്.എസ്.ഇ. വിദ്യാർഥികൾക്കും എൻ.എസ്.എസ്. പ്രവർത്തനങ്ങളിൽ പങ്കാളികളാവാം. സ്വാശ്രയ മേഖലയിലായത് കൊണ്ട് 75 വിദ്യാർത്ഥികൾ ഉള്ള യൂണിറ്റാണ് ഇപ്പോൾ നൽകുന്നത്. പ്രവർത്തനമികവിനനുസരിച്ച് ഇത് ഫുൾ യൂണിറ്റായി മാറും. പുതിയ പ്രോഗ്രാം ഓഫീസറായി ശ്രീമതി. അമ്പിളി നാരായണൻ ചുമതലയേറ്റു.
വി.എച്ച്.എസ്.ഇ. മുഖ്യ അലോട്ട്മെന്റിൽ അപേക്ഷിച്ചിട്ടും അലോട്ട്മെന്റ് ലഭിക്കാതിരുന്നവർക്കും ഇതുവരെയും അപേക്ഷ നൽകാൻ കഴിയാതിരുന്നവർക്കും സപ്ലിമെന്ററി അലോട്ട്മെന്റ് ന് അപേക്ഷിക്കാം. ഒക്ടോബർ 14 വൈകീട്ട് 5 മണി വരെ www.vhscap.kerala.gov.in എന്ന വെബ്‌സൈറ്റ് വഴി അപേക്ഷിക്കാം.
അപേക്ഷ പുതുക്കുന്നതിനായി ക്യാൻഡിഡേറ്റ് ലോഗിനിലെ EDIT/RENEW APPLICATION എന്ന ലിങ്ക് ഉപയോഗിക്കാം. ഇതു വരെയും അപേക്ഷിക്കാത്തവർ വെബ്സൈറ്റിലെ APPLY ONLINE എന്ന ലിങ്കിലൂടെ അപേക്ഷ സമർപ്പിക്കണം. അപേക്ഷ നൽകാൻ വേണ്ട സാങ്കേതിക സഹായം സ്‌കൂൾ ഹെൽപ് ഡെസ്കിൽ നിന്നും ലഭിക്കുന്നതാണ്.
വി.എച്ച്.എസ്.ഇ. അഡ്മിഷനുള്ള മൂന്നാം അലോട്ട്മെൻറ് പ്രസിദ്ധീകരിച്ചു. സെപ്റ്റംബർ 28 മുതൽ ഒക്ടോബർ 1 വരെ അഡ്മിഷൻ എടുക്കാം. www.vhscap.kerala.gov.in എന്ന അഡ്മിഷൻ വെബ്‌സൈറ്റിൽ നിന്നും അലോട്ട്മെൻറ് സ്ലിപ്പ് ഡൗൺലോഡ് ചെയ്തെടുത്ത് യോഗ്യത തെളിയിക്കുന്ന സർട്ടിഫിക്കറ്റുകളുമായി ഒക്ടോബർ 1 ന് 4 മണിക്ക് മുൻപായി സ്കൂളിൽ എത്തി പ്രവേശനം നേടാവുന്നതാണ്. അഡ്മിഷന് ഹാജരാകുമ്പോൾ, വിദ്യാർത്ഥി അപേക്ഷയിൽ അവകാശപ്പെട്ട എല്ലാ വിവരങ്ങളും തെളിയിക്കുന്നതിനുള്ള സർട്ടിഫിക്കറ്റുകൾ ഹാജരാക്കുക. അലോട്ട്മെൻറ് ലഭിച്ച വിദ്യാർത്ഥികൾ സ്ഥിരപ്രവേശനം നേടേണ്ടതാണ്.
കൂടുതൽ വിവരങ്ങൾക്ക് www.vhscap.kerala.gov.in സന്ദർശിക്കുക.
വി.എച്ച്.എസ്.ഇ. അഡ്മിഷനുള്ള രണ്ടാം അലോട്ട്മെൻറ് പ്രസിദ്ധീകരിച്ചു. സെപ്റ്റംബർ 23 മുതൽ 25 വരെ അഡ്മിഷൻ എടുക്കാം. www.vhscap.kerala.gov.in എന്ന അഡ്മിഷൻ വെബ്‌സൈറ്റിൽ നിന്നും അലോട്ട്മെൻറ് സ്ലിപ്പ് ഡൗൺലോഡ് ചെയ്തെടുത്ത് യോഗ്യത തെളിയിക്കുന്ന സർട്ടിഫിക്കറ്റുകളുമായി സെപ്റ്റംബർ 25 ന് 4 മണിക്ക് മുൻപായി സ്കൂളിൽ എത്തി പ്രവേശനം നേടാവുന്നതാണ്. അഡ്മിഷന് ഹാജരാകുമ്പോൾ, വിദ്യാർത്ഥി അപേക്ഷയിൽ അവകാശപ്പെട്ട എല്ലാ വിവരങ്ങളും തെളിയിക്കുന്നതിനുള്ള സർട്ടിഫിക്കറ്റുകൾ ഹാജരാക്കുക. താൽക്കാലിക പ്രവേശനം നേടുമ്പോൾ വിദ്യാർത്ഥി ഫീസ് നൽകേണ്ടതില്ല. എന്നാൽ സ്ഥിരപ്രവേശനം നേടുമ്പോൾ നിശ്ചിതഫീസ് നൽകണം.
കൂടുതൽ വിവരങ്ങൾക്ക് www.vhscap.kerala.gov.in സന്ദർശിക്കുക.
വി.എച്ച്.എസ്.ഇ. ഒന്നാം വർഷ ഏകജാലക പ്രവേശനത്തിനുള്ള അലോട്ട്മെൻറ് പ്രസിദ്ധീകരിച്ചു. സെപ്റ്റംബർ 14 മുതൽ 18 വരെ അഡ്മിഷൻ എടുക്കാം. www.vhscap.kerala.gov.in എന്ന അഡ്മിഷൻ വെബ്‌സൈറ്റിൽ നിന്നും അലോട്ട്മെൻറ് സ്ലിപ്പ് ഡൗൺലോഡ് ചെയ്തെടുത്ത് യോഗ്യത തെളിയിക്കുന്ന സർട്ടിഫിക്കറ്റുകളുമായി സെപ്റ്റംബർ 18 ന് 2 മണിക്ക് മുൻപായി സ്കൂളിൽ എത്തി പ്രവേശനം നേടാവുന്നതാണ്.
കൂടുതൽ വിവരങ്ങൾക്ക് www.vhscap.kerala.gov.in സന്ദർശിക്കുക.
